- CLEMENS VIII
- I.CLEMENS VIII.Antipapa, prius Aegidius, Arrago, a solo Arragoniae Rege agnitus, A. C. 1429. paulo post sponte cessit.II.CLEMENS VIII.Florentinus, prius Hippolitus Aldobrandinus, successit Innocentio IX. A. C. 1592. Henricum IV. Galliae Regem regnô primo exculsurus, moxcum eum praevalere, et consilia de Patriarcha in Gallia creando vigere animadverteret, anathemate exsolvit, Foedus sanctum inter Monarchas et Principes, ad exstirpandos Euangelicos instituit, cui omnes, Galliae Rege, et M. Duce Hetruriae exceptis, nomen dederunt. Ducatum Ferrariae, Alphonsô mortuô, vindicavit. Iesuitis, editô scriptô, Clementem VIII. credere legitimum esse Petri successorem, non esse articulum fidei, asserentibus, succensuit: illis nihilominus veniâ in Galliam redeundi impetratâ. Controversiam de Auxiliis, inter Iesuitas, auctore Molinâ, et Dominicanos, Augustini sententiam contra Pelagianos defendentes, non decidit. Obiit tandem A. C. 1605. aetat. 69. sedis 13. experientiâ rerum inclitus, sed fastu et perfidiâ infamis: ut qui Henricum IV. contra Elisabetham incitaturus, non veritus sit dicere: Posse Principes a foederibus resilire, sine famie periculo, posse mentiri, prodere, etc. Thuan. Hist. l. 113. 131. 132. Speculum Consil. Hisp. Rivetus, in Iesuita vapul. c. 4. Eum excepit Leo XI.
Hofmann J. Lexicon universale. 1698.